Siswa MTsN 9 Gunungkidul kasil nggayuh juwara 1 lan 2 lomba maca geguritan

Gunungkidul (MTsN 9 Gunungkidul)- Rahma Agustina Putri lan Billy Marshallo minangka siswa saking MTsN 9 Guningkidul kasil nggayuh juwara 1 lan 2 lomba maca geguritan tingkat SMP/MTs ing Kapanewon Rongkop. Lomba kasebut dipunwontenaken dening SMA Nagari 1 Rongkop ing acara pengetan ambal warsa SMA Nagari 1 Rongkop kaping 33. Lomba dipunlaksanakaken ing dinten Senen (13/3/2023) wonten ing SMA Nagari 1 Rongkop.

Pasarta lomba maca geguritan nampilaken geguritan wajib lan geguritan pilihan. Sedaya pasarta lomba ngagem busana adat gagrak Ngayogyakarta. Ambar Kusumawati, minangka pembina lomba kasebut, ngandharaken raos bingah awit prestasi ingkang sampun kasil dipungayuh dening siswa didikanipun. "Alhamdulillah, sekawan siswa minangka wakil saking MTs N 9 Gunungkidul saged tampil maksimal lan saged nggayuh juwara 1 lan 2." Ngendikanipun Ambar rumaos bombong. Ambar ugi ngandharaken pangajeng-ajeng supados prestasi punika saged paring pangaribawa ingkang sae dhateng para siswa Mad9G sanesipun.

Iskak Rusmadi minangka Kepala MTsN 9 Gunungkidul ngaturaken apresiasi dhateng para juwara. " Ngaturaken dherek bingah dhateng siswa ingkang pikantuk juwara, dene ingkang dereng saged nggayuh juwara tansah semangat, ampun nglokro. Bapak rumaos bombong ing manah dhateng generasi mudha ingkang saged nglestantunaken budhaya laladan. Tansah semangat ing pasinaon, ancasipun saged nggayuh prestasi prestasi ing wekdal salajengipun," ngendikanipun.